ახალი ღვინის ფესტივალი 2015
ზოგადი
8 მაისს თბილისში, რესტორან „ფუნიკულიორში“ რიგით მეექვსე „ახალი ღვინის ფესტივალი 2015“ გაიხსნა. ფესტივალის პირველი დღე იშვიათი ქართული ყურძნის ჯიშებისგან დაყენებული ღვინოების მასშტაბურ დეგუსტაციას დაეთმო. ღონისძიებას ესწრებოდნენ „ახალი ღვინის ფესტივალის“ მხარდამჭერი სახელმწიფო ორგანიზაციების - ღვინის ეროვნული სააგენტოს, თბილისის მერიის, ტურიზმის ეროვნული ადმინისტრაციის წარმომადგენლები, პროფესიონალი ენოლოგები, სომელიეები, „ახალი ღვინის ფესტივალის“ მონაწილე ღვინის დიდი კომპანიებისა და მცირე მწარმოებლების, ასევე, მედია სექტორის წარმომადგენლები - ჟურნალისტები, ღვინის ჟურნალისტები, ვაინბლოგერები, მწერლები როგორც საქართველოდან, ასევე, უცხოეთიდან (ჰოლანდია, იაპონია იტალია, აშშ, უკრაინა და სხვ.).
9 მაისს ფესტივალმა დედაენის ბაღში ათასობით სტუმარს უმასპინძლა.
„ახალი ღვინის ფესტივალი მნიშვნელოვანი დღესასწაულია მევენახეობა-მეღვინეობის დარგის განვითარებისთვის. საქართველოში ღვინის მოხმარებასა და ღვინის კულტურის ამაღლებაში ამ ფესტივალმა ძალიან დიდი როლი ითამაშა. აღსანიშნავია, რომ ფესტივალი უკვე მეექვსედ ტარდება და მისი მონაწილეთა და სტუმართა რაოდენობა ყოველწლიურად იზრდება. დიდი მადლობა ყველა მონაწილეს, ვინც ჩართულია ქართული ღვინის პოპულარიზაციის საქმეში. საქართველოში ღვინის კულტურის მოხმარების ამაღლება მეღვინეობის დარგის განვითარების ერთ-ერთ უმთავრესი მიმართულებაა“ - აღნიშნა ღვინის ეროვნული სააგენტოს თავმჯდომარემ, გიორგი სამანიშვილმა „ახალი ღვინის ფესტივალის“ გახსნის საზეიმო ცერემონიაზე.
ფესტივალზე წარმოდგენილი იყო 2014 წლის მოსავლის ახალი ღვინოები, რომელიც საქართველოს სხვადასხვა რეგიონიდან ღვინის 60-მდე კომპანიამ და მცირე მარანმა და 55-მა საოჯახო მარანმა წარმოადგინა.
10 მაისს, ახალი ღვინის ფესტივალი 2015-ის დასკვნით დღეს მოეწყო ღვინის ტურები კახეთისა და ქართლის რეგიონებში უცხოეთიდან საგანგებოდ მოწვეული სომელიეების, ბლოგერების, ღვინის ჟურნალისტების, მწერლების, ღვინისა და ალკოჰოლური სასმელების დისტრიბუტორებისათვის. ენოტურებში, ასევე, ჩართულნი იყვნენ ადგილობრივი ღვინის პროფესიონალები, მედიის სფეროსა და ტურისტული ორგანიზაციების წარმომადგენლები. ფესტივალზე ტრადიციულად ქვევრიც გაიხსნა.